Safnadagurinn tóks með eindæmum vel og hátt í 100 manns mættu á safnið. Hrútafjörðurinn tók á móti gestum baðaður í sól. Þór Magnússon hafði nóg að gera og fræddi gesti um sögu og muni safnsins. Einnig komu margir gestir með sínar reynslusögur af munum safnsins eða sögur frá forfeðrum sínum.

Það var unnið af kappi í Syðstahvammi, prjónað, talað og hlegið.

Takk kærlega fyrir góðan dag.

Á morgun verður Þór Magnússon sem setti upp sýningar Byggðasafns Húnvetninga og Strandamanna með leiðsögn um safnið. Þetta er einstakur atburður sem verður ógleymanlegur.

Safnadagurinn á Byggðasafninu að Reykjum verður ánægjulegur því Þór Magnússon fv. þjóðmunavörður ætlar að vera hjá okkur og veita okkur upplýsingar um safnið, muni þess og sögu.

Einnig verða Elínborg Ólafsdóttir og Guðrún Árnadóttir með prjónana sína og jafnvel einhverjir fleiri.

Frítt er inn á safnið og heitt á könnunni.

Fjölmennum öll og eigum saman í þessu skemmtilega safni með Þór Magnússyni góðan og skemmtilegan dag.

Töluvert hefur verið unnið að rannsóknum og minjavörslu á Byggðasafinu á Reykjum í Hrútafirði.

Má þar nefna varðveislu á Hindisvíkurbátsins sem notaður var til sela- og hrognkelsaveiðar. Þar vann Stefán Þórhallsson gott verk, fyllti upp í gliðnunarsprungur með kítti ofl. skipti um sauma, málaði ofl. Að lokum flutti hann bátinn og kom honum fyrir ínn á safninu með hjálp Jóhannesar Jóhannesarsonar, Ágústar Jóhannessonar og Karls Aspelundar sem  kom til að kynna sér textílmuni safnsins með Dr. Láru Magnúsardóttur forstöðumanni fræðaseturs á Skagaströnd. Vil ég fyrir hönd safnsins þakka Stefáni fyrir. Til aðstoðar við verkið var Börn Sigurðsson, Halldór Sigurðsson frá Efri - Þverá geymdi bátinn í smíðageymslu sinni í vetur og starfsmaður Pakkhússins flutti bátinn úr þeirri geymslu í bílskúr Stefáns þar sem lagfæringar fóru fram. Er þeim einnig færð þakklæti.

 Karl Aspelund er búinn að mæla upp reiðbúning Ingibjargar Guðmundsdóttur frá Saurum í Miðfirði og rissa upp sniðteikningu. Á áætlun er að sýna reiðjakkann eða eftirlíkingu af honum hjá Sögusetur íslenska hestsins ef hann uppfyllir þær kröfur sem sýningastjóri gerir.

 Karl er einnig búinn að líta á Skautbúning unninn af Margréti Sigurðardóttur prófastfrú fyrir Elínu Jónsdóttur á Skagaströnd. Þessi skautbúningur er balderaður með gyltu sérkennilegt munstur sem virðist vera af melgresi. Karl hefur ekki séð slíkt mynstur fyrr á Íslandi.

Á áætlun er að Benjamín Kristinsson frá Drögnum komi og mæli upp og teikni báta sem voru að koma í hús. Í framhaldi af því verða upplýsingar um báta safnsins sendar Stofnun Vilhjálms Stefánssonar.

Mikið hefur verið að gera við rannsóknir á Byggðasafninu það sem af er sumars.

Stefán Þórhallsson tók Hindisvíkurbátinn sem staðið hefur við Selasetrið til gagngerar endurbætur. Hann bar á bátinn, þétti rifur, bætti við saumum, málaði o.fl. Að lokum flutti hann Hindisvíkurbátinn á Byggðasafnið Reykjum í Hrútafirði. Takk fyrir það Stefán.

Skoðaðir hafa verið búningar safnsins af Karli Aspelund, meðal annars skautbúningur bæði treyja og pils í eigu Elínar Jónsdóttur Skagaströnd. Margrét Sigurðardóttir prófastfrú á Höskuldsstöðum vann búninginn á kvennaskólanum á Ytri-Ey árið 1887. Skautbúningurinn er með óvenjulegu mynstri sem er gyllt balderað, sennilega af melgresi.

Einnig hefur reiðbúningurinn verið mældur upp og rissað niður sniðteikning af Karli Aspelund. Karl ætlar að grennslast fyrir um uppruna reiðjakkans og teikna af honum snið ef ástæða þykir. Reiðbúningur þessi var í eigu Ingibjargar Guðmundsdóttur frá Saurum í Miðfirði.

Búið er að flytja inn á Byggðasafnið gamla báta annar er ekki nema hálfur. Benjamín Kristinsson frá Dröngum ætlar að mæla bátana upp og teikna.

Upplýsingar hafa borist safninu um húsaskipan í Kúvíkum, Friðrika Sigurðardóttir dóttir Ínu Jenssen frá Kúvíkum og Sigurðar bjó í Kúvíkum til 1946 ætlar að fræða safnvörð nánar um lífshætti þar. Ína var dóttir hjónanna Karls Friðriks Jensen og Sigríðar Pétursdóttur frá Kúvíkum. En á safninu eru m.a. gripir sem Matthias Jochumson skáld gaf þeim í brúðargjöf, kanna, stofustáss hjónanna eins borðstofusett, sófasett, kommóða, orgel ofl.

Kristín Böðvarsdóttir í Hveravík kom við til að fá númer af prjónavél sem móðir hennar,  Gróa Oddsdóttir frá Þóroddsstöðum gaf safninu. Ætlunin er að fá nánari upplýsingar um vélina, aldur hennar, sögu ofl.